“Их говийн тэмээ 2025” тэмээчдийн баяр, улсын зөвлөгөөн болж өнгөрлөө.

Монголын нүүдлийн соёл, бэлчээрийн мал аж ахуйн нэгэн төрөл болох тэмээн сүргийн тоо толгойг өсгөх, үүлдэр, ашиг шимийн чанарыг сайжруулах, соёл, аялал жуулчлалыг тэмээн спорттой уялдуулан хөгжүүлж, иргэд, олон нийтэд сурталчлах зорилгоор Дорноговь аймгийн Сайншанд хотод 2025 оны 2 дугаар сарын 7-оос 8-ны өдрүүдэд “Их говийн тэмээ-2025” тэмээчдийн баяр, улсын зөвлөгөөн зохион байгуулагдаж, тус арга хэмжээнд Дорноговь, Говь-Алтай, Баянхонгор, Өмнөговь, Дундговь аймгийн тэмээчид, нийт 955 тэмээтэй оролцлоо.

Уг арга хэмжээнд Хятадын талаас БНХАУ-аас Замын-Үүдэд суугаа Ерөнхий Консул Кэ Юушэн, Дэд ерөнхий консул Жан Иши, Дэд консул Хасмөчир, болон албаны бусад төлөөлөгчид, Монголын талаас БНХАУ-ын Эрээн хотод суугаа КГ-ын төлөөлөгчид урилгаар оролцов. 

Арга хэмжээний үеэр ат, тайлаг, торомны уралдаан, буухиа уралдаан, тэмээний сүү, цагаан идээ, ноос, арьсаар хийсэн бүтээгдэхүүний үзэсгэлэн худалдаа, өвлөн уламжлагчдын тусгай үзэсгэлэн болж, “Шилмэл буур”, “Шилмэл ингэ” шалгаруулах зэрэг олон төрлийн тэмцээн уралдаан зохион байгуулагдав.

Цаашид энэхүү арга хэмжээг уламжлал болгон зохион байгуулснаар хил орчмын аялал жуулчлалыг дэмжих, монгол соёл, өв уламжлалыг таниулан түгээн дэлгэрүүлэхэд чухал ач холбогдолтой ба жуулчдыг татаж чадахуйц арга хэмжээ болно гэж үзжээ.